ԳՅՈՒՄՐՈՒ ԹԻՎ 1 ԱՎԱԳ ԴՊՐՈՑ: апреля 2017

среда, 26 апреля 2017 г.

Ուսուցումն առավել արդյունավետ է, երբ ուրախություն է պատճառում: (Պ. Կլայն)

Մեր VII բ դասարանի համար այս ճշմարտությունը փորձված է քանիցս: Հերթական արտադասարանական ուսուցումը. այս անգամ՝ «Ճանաչենք, որ սիրենք կամ մեր մշակութային ժառանգությունը» բացօթյա դասերի շրջանակում: Ուսուցման վայրը՝ Երերույքի տաճար:
     Միայն առաջին հայացքից «շիկավուն» գեղեցկուհին կիսավեր ու անխոս թվաց: Իսկ հետո... շունչ առավ ու մի քիչ պատմեց իր մասին: Ախր ինքը մեկուկես հազարամյակ կանգնած է նայում արևի լույսին, էլի՞ չհոգներ: Ի՜նչ փառավոր անցյալ պիտի ունեցած լինի, եթե անգամ ծերացած ու մաշված, բայց այսքան հմայիչ է: Հյուրընկալ էր Երերույքը, բայց ոչ շատախոս, ոչ գանգատավոր: Չի պատմում, թե ինչ է անցել գլխով, չի խոսում իր փեշերին հավերժ ննջողների մասին: Ի՞նչ գաղտնիքների մասին են լռում քարանձավները, ու՞մ աղոթքների մրմունջներն են իրենց տակ թաղել ծանր սյուները: Չի պատմում անգամ, թե ո՞ր դարում են իր ճակատին փորագրություն արել: Բայց ա՛յ, մեր փոքրիկների աչքը տարբերում է փորագրությունը խազմզոցներց, որոնք անուններ են հոդում, ու դարերի պատմություն չունեն, այլ տարիների, ամիսների: Հայ հերոստրատոսների անուններ, որոնք հավակնում են «ապրել» ... որքան կանգուն կմնա Շիրակ աշխարհի վսեմաշուք տիրուհին...
     Մեր մանուկների աղոթքը՝ ի հիշատակ Եղեռնի զոհերի, տաճարի գաղտնալուռ խորանը ևս թաք կտա իր հիշողության խորքերում, իսկ երեխաները՝ ակնածանքն աչքերում, իրենց մտքի ամբարում կպահեն վեհատեսիլ տաճարի հյուրամեծարությունը, բայց նաև այն պահպանելու հրամայականը:
     Վերադարձին կանգ առանք Ջրափիի Ս. Աստվածածին եկեղեցու տարածքում՝ ուղիղ քարավանատան պատի տակ: Փոքր-ինչ հանգստացանք, ապա անցանք օրվա երկրորդ բացօթյա դասին: Առարկան՝ «Ընդհանուր գիտելիքներ», թեման՝ «Հին հունական թատրոնը և հունական հնավայր Ակրոպոլիսը»: Հետո Մանուշակի շուրթերից հնչեց Կոմիտաս, ապա՝ մի քիչ ասմունք, հայրենասիրական երգեր... ու զանգի ձայնը...

вторник, 25 апреля 2017 г.

ՁԵԶ ԲԱՑԱԿԱ ՉԵՆՔ ԴՆԻ Թիվ 1-ում սովորողները շաբաթ օրը լուռ կանգնած էին շիրմաքարերից ապրողներին նայող 90-ականների և ապրիլյան պատերազմի հերոսների նկարների առջև: Դեռ փոքր են, բայց նայում են ու գիտակցում, թե որն է խաղաղության գինը: Փոքր են, բայց սկսում են հասկանալ, որ մահն է, արժևորում կյանքը, որ քառորդ դար չլրացրած երիտասարդները չհասցրին ապրել, բայց հերոսացան, որ ուրիշներն ապրեն: Մեկ առ մեկ հիշում էին իրենց իմացածը անմահացած հերոսների սխրանքների մասին, իսկ ավելի մանրամասն՝ փոխգնդապետ Ալեքսան Առաքելյանի մասին: Ինքնազոհ հայ սպայի հայրենանվիրումը վավերացվում է նրա գիտակցված մահով, որի մասին պատմում էր մորմոքը դժվարությամբ թաքցնող հայրը՝ Գևորգ Առաքելյանը: Բայց երեսունամյա սպան նաև ապրել է երկրին, զինվորին, ազգին նվիրված ու իր ծնողին թողել իր կյանքով ու մահով հպարտանալու իրավունքը: Այդ մասին էլ էր պատմում որդեկորույս հայրը և իրեն լսող աշակերտներին տալիս հայրենի երկրի, ծնող ազգի արժեքներն ու հերոսների հիշատակը բարձր պահելով ապրելու դասեր, չմոռացվող դասեր... Թիվ 1-ի՝ ապրիլյան հերոսների հիշատակին նվիրված անկյունում նրանց լուսանկարներին նայելիս պատերազմի ավերն զգացած ու հերոսներով հպարտացող յուրաքանչյուր աշակերտ անվերապահորեն կասի. «Ձեզ բացակա չենք դնի: Ձեզ արժանի կլինենք»...

вторник, 18 апреля 2017 г.

<<Ազգային տոներ և ծեսեր>> շարքից նշեցինք նաև Սուրբ Զատիկը։ Թիվ 1-ի համայնքը այն տոնեց իր բարեկամների, հյուրերի հետ։
Քրիստոտ հարյավ ի մեռելոց․․․
Օրհնյալ է Հարությունը Քրիստոսի։
Մեզ և ձեզ մեծ Ավետիս․․․

пятница, 14 апреля 2017 г.

Հաշվետվություն

2016-2017 ուսումնական տարվա մարտ ամսին կատարած դասղեկական աշխատանքի

Մարտ ամսին հատուկ մոտեցում ցուցաբերվեց VIII^ա դասարանում սովորող ԿԱՊԿՈՒ աշակերտներին, հանդիպումներ կազմակերպվեցի նրանց ծնողների հետ, քննարկվեցին ուսումնադաստիարակչական աշխատանքների արդյունավետ իրականացման հետ կապված խնդիրներ:

VIII^բ դասարանի 2 ֆրանսախոս աշակերտ մասնակցեցին ֆրանսախոսության շրջանակներում Ալիանս Ֆրանսեզի և Ֆրանսիական դեսպանատան կողմից կազմակերպված թատերական փառատոնին և իրենց հուզիչ խաղով ու գեղեցիկ խոսքով փայլեցին բեմում:

Մարտի 25-ին Բեռլին Արտ հոթելում VIII դասարանի աշակերտները մասնակցեցին Հրայր Հակոբյանի «ԱՅԲ» անհատական ցուցահանդեսին, որը ներառում էր հետևյալ փուլերը՝ հայոց տառերի առաջացումը և կառուցվածքը, իմ ինտերակտիվ Ա տառը: Նրանք հիացան հայկական զարդագրերի գեղեցկությամբ և յուրօրինակությամբ:

Գյումրու դրամատիկական թատրոնում դիտեցինք Ամերիկաբնակ լեհ դրամատուրգ Ռիչարդ Կալինոսկու «Հրեշը լուսնի վրա» պիեսը: Հաջորդ օրը տեղի ունեցավ պիեսի քննարկումը դպրոցում: Նշվեց, որ պիեսն անուղղակի առնչվում է Հայոց ցեղասպանությանը։ Գործողությունը զարգանում է Միացյալ Նահանգներում և ներկայացնում է կոտորածից փրկված, որբացած Արամի ու Սեդայի կյանքի պատմությունը: 1920-ականներին հայերի հավաքական կերպարը ներկայացնող պատանի հերոսները փորձում են նոր կյանք սկսել օվկիանոսից այն կողմ:

VIII-ցիները ակտիվորեն մասնակցեցին նաև «Խորան Արդ» ինտելեկտուալ կենտրոնի գործադիր տնօրեն Արմեն Պետրոսյանի վարած շաբաթօրյա դասերին:

Դասղեկ՝ Ա. Գրիգորյան

четверг, 13 апреля 2017 г.

Թիվ 1 ավագ դպրոցում տեղի ունեցավ <<Ո՞վ է ուզում դառնալ միլիոնատեր>> մաթեմատիկական մրցույթը։ Մասնակցում էին VII-IX դասարանի աշակերտները։ Հիանալի գիտելիքներով հանդես եկան VIII դասարանի աշակերտները, որոնք էլ հաղթող ճանաչվեցին։

пятница, 7 апреля 2017 г.

Այսօր թիվ 1 ավագ դպրոցի ուսուցիչները, աշակերտներն ու ծնողները հյուրընկալվել էին Մայրենի լեզվի և գրականության քաղաքում. բարեշեն մի քաղաք, որտեղ յոթից մինչև տասնմեկերորդ դասարանի աշակերտներն իրենց գիտելիքների քառաբաժան թաղամասը կառուցեցին՝ մեկ առ մեկ վեր խոյացնելով իմացության իրենց շենքերը: Մրցույթ էր, և տանտերերը՝ Հայոց լեզուն ու Գրականությունը, հրավիրել էին նաև Կինոարվեստին, Գեղանկարչությանը, Երաժշտությանը, ոչ ավելի, ոչ պակաս՝ Բերդերին: Մի կողմից հայկական առածներն էին ձեռքով անում, մյուս անկյունից՝ դիցաբանական դարձվածքները: Հրապարակում հնչում էին հայ դասականների բառերով գրված երգերը, իսկ ցայտաղբյուրի մոտ հենց բանաստեղծներն էին ասմունքում: Խոնարհվեցինք բակում նստած հայ գրողների մայրերի առջև, քիչ էր մնում խաղայինք հենց իրենց՝ դեռևս մանուկ ու պատանի գրողների հետ: Տարբեր տարիքի աշակերտներն այնքա՜ն համերաշխ էին մրցակցում միմյանց հետ, որ մի պահ նույնիսկ կոալիցիա կազմեցին: Բայց հաղթակամարը կառուցեց իններորդցի Սուրեն Թադևոսյանը, որն էլ ստացավ պարգևը:
Գեղեցիկ զգացումներով ու երախտագիտությամբ մեկնեցինք Մայրենի լեզվի և գրականության քաղաքից՝ հույսով, որ մոտ ապագայում վերստին կհյուրընկալվենք:

четверг, 6 апреля 2017 г.

Xա դասարանի աշակերտները հերթական մասնագիտական կողմնորոշման դասը անցկացրին Վարդան Աճեմյանի անվան պետական դրամատիկական թատրոնում։ Աշակերտները ծանոթացան թատրոնում տարվող տարբեր աշխատանքներին և այդ բեղմնավոր աշխատանքի արդյունքը հանդիսատեսի կողմից գնահատվող ներկայացումներն են։ Երեխաները տեսան, թե որտե՞ղ և ինչպե՞ս են պատրաստում ներկայացումների դեկորացիաները, հագուստները։ Ինչպե՞ս են հնչյունավորում և լուսավորում ներկայացումները, և որտե՞ղ են դերասանները կերպարանափոխվում և պատրաստվում ներկայացմանը։ Զրուցեցին տարբեր մասնագետների հետ, որը ամփոփեց թատրոնի գլխավոր ռեժիսոր Լ․ Հարությունյանը։ Աշակերտները վառ տպավորություններով և լավ տրամադրությամբ հեռացան թատրոնից։

Продолжается традиция старшей школы N1 "Апрель- месяц русского языка". Сегодня была проведена викторина по русским народным сказкам, и победителем признана ученица VIIб класса Гукасян Манушак...